जब-जब बढल बा ठंढ सियासत के गांव में

तापल गइल गरीब के मड़ई के जराइके

विश्वनाथ प्रसाद 'शैदा' जी के दू गो रचना कालजयी ह । अइसे त उहां के लिखल अनेकन गो गीतन के तासीर साहित्यिक रुप से अतना पोढ आ गोट ह जवनन के तुलना कवनो भाषा के कालजयी रचनन से हो सकेला बाकिर तबो उ दुनो रचना, पहिला - बतावs चांद केकरा से कहाँ मिले जालs; आ दुसरका रचना - खुदा के भी घर बे बोलवले ना जाई । दुसरका गजल ह बाकि ह बड़ा शानदार । करेजा खखोर के राखि देला । माने कहल जाला कि जब अनुभव रुपी पथर प जिनिगी रगराले घिसाले त उ रीठा हो जाले, ठीक ओइसहीं शैदा जी के उ गजल रीठा ह ।

पिछला कुछ समय से किताब पढे लिखे के छुटल रहल ह, काम के व्यस्तता तनि बेसी हो गइल बा एह वजह से किताब के लमहर बैकलाग हो गइल बा आ डॉ उदय नारायण तिवारी जी के किताब ' भोजपुरी भाषा और साहित्य' फेरु से अझुरा देले बिआ, जवना के रोज एक दू पैरा पढ रहल बानी । बाकिर तबो, एहि में ओ‌डी मारत किताब, पत्र-पत्रिका के पढाई हो जाला ।

भोजपुरी में एगो पत्रिका ह 'परास' लमहर समय ले इ पत्रिका आपन छाप, भोजपुरी भाषा आ साहित्य प छोड़ले बिआ आ एह पत्रिका के संपादक हईं डॉ आसिफ रोहतासवी जी । इहां के खुद एगो बड़ा शानदार आ निठाह गजल लेखक हईं । एहि 'परास' पत्रिका के अप्रैल-जून-2010 अंक के पढत रहनी ह । असल में इ अंक कानू सान्याल के समर्पित बड़ुवे बाकिर पत्रिका के पहिला पन्ना पलटते जगन्नाथ जी के लिखल दू गो गजल पढे के मिलल ह । अउरी बहुत कुछ पढे के मिली एह पत्रिका में बाकिर हमार अंगुरी एह 44 पेज के पत्रिका में पेज नम्बर 29 प जा के रुक गइल ह आ फेरु पढे के मिलल ह, शैदा जी लिखल गजल ( खुदा के घर) के तेवर के समानांतर चले वाला एगो गजल । 

एह गजल के लेखक बानी रामेश्वर प्रसाद सिन्हा 'पीयुष' जी ।

गजल के पढीं -

कतनो हिया में बात के राखी छिपाइके

तबहूँ निकल ऊ जात बा ओठन प आइके

लागल कि मन फुहार में भींजी गतर-गतर

केहू गइल उमेद के बदरी उड़ाइ के

जिनिगी भ जे अन्हार में घुट-घुटके मर गइल

राखल बा का मजार प दीया जराइके

जेकरा कउल प हमरा भरोसा रहे बहुत

अचके मुकर गइल बा ऊ मंदिर में जाइके

कइसे कहीं, लगाव ना उनुका ले रह गइल

रिस्ता टिकल बा दोस्त से दुश्मन प आइ के

जब-जब बढल बा ठंढ सियासत के गांव में

तापल गइल गरीब के मड़ई के जराइके

कइसन ह सुख सुराज के 'पीयुष' का कहीं

कुछ लोग लूट लेत बा तिकड़म भि‌डाइके

बहर कहीं मक्ता कहीं शेर कहीं जवन मन करे तवन कहीं बाकिर एह गजल के पढत घरी आ एकर माने बुझत घरी रउवा भोजपुरी भाषा आ साहित्य के तेवर के थाह लागी आ संगे संगे, एगो बिदेसी विधा में भोजपुरिया लेखनी के जबराट बाकिर मुलायम भाव रउवा सभ के पढे के मिली ।

परास पत्रिका के इ अंक भोजपुरी साहित्यांगन प लागल बा रउवा सभ एह अंक के ओजुगा से फोकट में डाउनलोड क के पढ सकेनी , अउरी बहुत कुछ बा ओह में जवनन के पढि के आपन विचार राखि सकेनी ।

एहि पत्रिका में कानू सान्याल प लिखत राजकमल चौधरी के एगो बड़ा शानदार हिंदी रचना के जिक्र बा जवन, हमरा निजी रुप से बड़ा जबरजस्त आ शानदार लागल । उ हिन्दी रचना ह -

आदमी को तोड़ती नही हैं लोकतांत्रिक पद्धतियाँ

केवल पेट के बल उसे झुका देती हैं

धीरे-धीरे अपाहिज

धीरे-धीरे नपुंसक बना लेने के लिए

उसे शिष्ट राजभक्त

देशप्रेमी नागरिक बना लेती है

आदमी को इस लोकतंत्री संसार में

अलग हो जाना चाहिए ।

राजकमल जी के एह पंक्तियन के पढला के बाद अब एक हाली फेरु से रामेश्वर प्रसाद सिन्हा जी के उपर के गजल के अंतिम दू गो शेर के पढीं -

जब-जब बढल बा ठंढ सियासत के गांव में

तापल गइल गरीब के मड़ई के जराइके

कइसन ह सुख सुराज के 'पीयुष' का कहीं

कुछ लोग लूट लेत बा तिकड़म भि‌डाइके

भोजपुरी भाषा आ साहित्य के विकास खातिर, भोजपुरी में लिखत पढत रहीं । भोजपुरी, बड़हन भूभाग के भाषा ह एह से ओह बड़हन भूभाग प एह भाषा के तेवर आ ताव बना के राखे खातिर एह में लिखल पढल जरुरी बा ।

- नबीन कुमार